Wolfganginpng Blog

Tingim, taim mama i kamap lapun tru na em i no inap mekim wok gaden o wasim klos o redim kaikai, wanem samting bai kamap? Klia tumas, ol wantok, ol pikinini na tumbuna pikinini bai lukautim em! Lapun mama bai sindaun aninit long haus klostu long paia na stap wantaim ol. Em bai mekim sampela hanwok bihainim laik na strong blg em, rausim skin blg ol kaukau, lukautim bebe, wokim bilum, givim gutpela advais long ol yangpela, kain olsem.

Long Jemeni planti lapun i no inap stap wantaim ol wantok taim ol i kamap lapun tru. Ol pikinini bilong ol, ol i no gat taim long lukautim ol na givim han long ol. Long wanem? Nomali wok mani i fosim ol femili long bruk na ol wantok i lusim asples na stap nabaut nabaut. Ol femili i no gat planti memba tumas. Tripela pikinini tasol ol i kolim planti! Wanwan de papa, mama na (ol) pikini i savi lusim haus long moning tru na kam bek let long apinun. Husat inap lukautim lapun mama? Em bai stap wanpela tasol. Tingim bel hevi blg em!

Long adresim dispela hevi sios na gavman i kamapim na lukautim ol haus blg ol lapun. Nes i stap, pasto i stap, kuk i stap na planti ol arapela lain i ronim dispela institusen. Ol i save wok hat olsem na sindaun blg ol lapun i kamap gutpela. Tasol! Sapos yu askim ol lapun long laik bilong ol, klostu olgeta bai bekim olsem „Mi laik ol pikinini i ken laukautim mi na mi laik indai long haus bilong mi yet. Maski long muv i go long wanpela haus bilong ol lapun.“

Dispela piksa i soim „Haus St. Dominikus – Haus bilong lukautim ol lapun“. Em stap hapsait long haus bilong mipela. Em lukluk i go aut long windo blg kitchen blg mipela.