Wolfganginpng Blog

Bihainim pasin bilong taim mi stap long PNG tingting bilong mi i save stap klostu long Tok Pisin. Mi bin painim aut olsem, sapos mi inap tingim long Tok Pisin, autim tok long Tok German i kamap moa klia na kongregesin i inap harim gut. Fani, a? Olsem na tude mi tingim dispela moning divosin i kamap long Tok Pisin. Teks em Mattyu 4:1-11. Mi inap samaraisim olsem:

Tru a, yumi Kristen yumi stap insait long taim bilong traim? Sapos mi skelim laip na sindaun bilong ol manmeri long graun i luk olsem planti ol hevi i stap nabaut nabaut. Planti manmeri i save kaikai ston tasol. Tasol yumi gat bikpela laik long kaikai bret! „Ston“ em i piksa bilong situasin bilong planti manmeri long PNG. Mi inap listim olsem

• Bikpela senis i kamap na planti painim laip i hat.
• Divelopmen i pundaun. Planti ples i no gat skul, haus-sik, gutpela rot na bris, maket, beng, polis-stesin. Bisnis, helt, edukesin, jastis na sikiuriti i go daun.
• Laik bilong helpim wantok i go daun tu.
• Mangal pasin i go antap. Sampela i gat planti, tasol planti i gat liklik. Long Mosbi mi lukim planti nupela ekspensiv car i stap long trafficjam na kantri i pulap long ol mobailfon. Husat bai inap kisim?
• Olgeta pasin bilong korapsen i go bikpela moa.
• Strongpela dring na drug i bagarapim ol yangpela na kamapim hevi. Maski long taun o long rural erea yumi inap harim ol spakman i bikmaus long nait.

Planti kain ston olsem i stap.

Wankain long Germany! Sapos mi skelim situesin long hia mi inap stori long planti samting nogut. (Bai mi ripot long dispela blog.) Ol kantri bilong yumi i kamap olsem bikpela ples drai pulap long ston.

Tasol kristen bilip i inap helpim yumi insait long dispela traim. Yumi yet yumi no inap winim pait. Jisas i narakain. Mattyu 4 i givim gutpela eksampol: Jisas i gat tok wantaim papa bilong hevi, em Satan olsem, „Yu klia. Buk bilong God i tok: ´Yu mas aninit long God, Bikpela bilong yu. Na yu mas lotu long em wanpela tasol.´“

Jisas i no win long strong bilong massel o paua bilong en. Em i no kisim bainat o samting bilong pait. Em i toktok tasol. Long stori bilong Matyu 4 Satan i gat tok na Jisas i gat tok. Satan i laik pulim em long tudak long toktok tasol. Tasol Jisas i tromoi lait long tudak wantaim tok bilong em.

Tripela taim Jisas i tok olsem: Buk bilong God i tok…
Buk bilong God i tok: ol manmeri i no inap kisim laip long kaikai tasol.

Buk bilong God i tok: yu no ken traim strong bilong God.
Buk bilong God i tok: yu mas aninit long God.

Buk bilong God i tok… Min olsem: God, em yet i tok. Sapos yumi stap insait long dispela tok na harim na skelim na tanim na serim tok bilong em, yumi stap long lait. Tok bilong God tasol i winim dispela pait wantaim Satan.

Long tok bilong Krais, God i mekim kamap olgeta samting. I no gat wanpela samting i kamap long narapela rot. Olgeta samting i kamap, em tok bilong em i mekim kamap. Long tok bilong God Jisas i kamap laip na lait bilong yumi. Dispela lait i save lait i stap long tudak, na tudak i no inap daunim em.

No ken lus tingting olsem, tok bilong God i gat paua, tok bilong God i gat laip, tok bilong God i inap tanim bel na tingting na pasin bilong yumi.